النهارده يوم مختلف
عيد ميلاد جدى كان النهارده
كمل التمانين سنة :)
كان طول عمره أقرب إنسان ليا
مع فرق السن الكبير اللى بينا
عمرى ما حسيت أنه عجوز أوى كده
طول عمرنا بنكلم مع بعض فى كل حاجة
و نلعب طاولة سوا-و بيغلبنى- و أتحجج دايما أنى مش عايز أشد عليه بس عشان هو راجل عجوز :)
النهارده كنت بكلم معاه عن الأرف اللى بقينا عايشين فيه حاليا
كل حاجة بايظة
التعليم و الحكومة و الشرطة و البلد كلها
قالى الفرج قريب
سألته
-إزاى؟
- الثورة قربت
- مش فاهم
- هات الجرنان و أنا أوريلك
شايف الإعلان ده
-فيلات بمقدم 160 ألف جنيه
-و شايف الخبر ده
- ناس مش لاقيين شوية مية يشربوها
-يبقا قربت ولا لأ؟؟؟
انتوا إيه رأيكم؟؟؟
4 comments:
اسلوب جميل ومعبر
كل سنة وجدو بالف صحة
على فكرة
هو عنده حق
الثورة
قربت جدا
جدا
شاب مصرى
ربنا يخليك و يخلى لى جدو يا رب :)
و لو فعلا الثورة قربت
تعتقد أنها حتبقى ثورة شعبية ولا عسكرية ؟؟؟
اولا كل سنه وجدو طيب وربنا يخليه ليك يارب
ثانيا:حاسه ان جدو متفائل اوى ومش عارفه ايه السبب انه يقول ان فى ثورة جايه.ما الناس قرفانه من زمان وبتعانى من فقر وظلم وسلطه حكومه ملهاش اى رادع بتسمع شكاوى الناس من ودنها اليمين وتخرجها من الشمال.بيسيبوا الناس تتكلم زى ماهى عايزة فى الجرايد والتليفزيون وعلى النت وبتعمل اللى فى دماغها زى ماهى شايفه ان دا فى مصلحه ليها بس اول ما تحس ان فى حد زودها شويتين عن اللازم بتجيبه من قفاه زى ناس كتييييييير اوى والاسماء معروفه
دا راى
ولو على راي"شاب مصرى"ان فى ثورة وطبيعى مش هتكون عسكريه علشان الحكومه مظبطه الجيش والشرطه اخر تظبيييييييط الجيش واكلها ولعه والشرطه وزيرها مخلل فى الحكومه واى قضيه كبيرة والشعب بيتكلم عنها بتتظبط لاى حد علشان الناس تكون سكمن بكمن وسلطه ملهاش حدود ليهم بعد قانونا الجديد الا وهو قانون مكافحه المصريين الغلابه قصدى مكافحه الارهاب
وتقولى ثورة شيلاه يا ثوره
حيييييييييييييييي
lonlysmily
اللى خلاه يقول كده أن الموضوع زاد عن حده جامد أوى و مبقاش نافع.
زمان مكنش فى كشف للفساد بالطريقة الموجودة النهارده.
جرايد معارضة و فضائيات و إنترنت و مدونات و حركات شعبية
مبقاش اللى كارهين النظام فئة محدودة
بقا الشعب كله كاره الحكومة من كبيرها لصغيرها
و محدش بيسأل ولا حد بيهتم
و عموما حتى لو محصلتش ثورة
أظن أجل مبارك قرب
و ساعتها حنشوف الدنيا حتتغير للأحسن ولا للأسوأ
Post a Comment