إتفرجت إمبارح على فيلم النينجا تيرتلز الجديد
TMNT
و إفتكرت أيام الماضى الجميل
أيام ما كنت بأخد الطبق بتاعى من على السفرة فى رمضان ساعة الفطار
و أقوم أقعد قدام التلفزيون و أشغل القناة التانية و أتفرج على سلاحف النينجاااااااا
رفايلوا و دوناتيلو و ليوناردوا و مايكل أنجلو
و الأعداء فرام و شنخر و صخر
ياااااااااااااااه
فين الجو ده من زمااااااااااان
إمبارح حاولت أجدد لنفسى الجو ده تانى
بس إكتشفت إنى أتأخرت كتيييييييييير
مبقاش فى شنخر ولا صخر ولا حتى فرام :(
السلاحف إنتصروا عليهم من زماااااااااان
و بقوا بيحاربوا أعداء من نوع جديد
مخلوقات فضائية و وحوش عندهم 3000 سنة
بس الجديد فى الموضوع
أن ليوناردوا و رفايلوا بقا بينهم مشاكل
تخيلوا
حتى السلاحف بتتخانق مع بعض
رفايلوا عايز يبقا هو القائد
و ليوناردوا شايف أنه هو الأصلح للقيادة
ويبدأ الصراع بين الإتنين على القيادة لحد ما يبقا ليوناردوا
هو القائد فى أخر الفيلم برضا الكل بما فيهم رفايلوا
واضح أن مش أحنا بس اللى عندنا مشاكل
حتى السلاحف كمان بتعانى
و واضح أنى لما حنيت لطفولتى
لقيت طفولتى نفسها كبرت و عجزت :(
12 comments:
حتى السلاحف كمان بتعاني..
صحيح والله
في هذه الأيام..كل شئ بيعاني..حتى السلاحف..وأبطال الكارتون
يمكن الفرق بين النينجا ترتلز على أيام طفولتنا السحيقة..والنينجا ترتلز الآن,,هو الفرق بين..أيامنا زمان ..وأيامنا دلوقتي
زمان كانت الدنيا بسيطة..والأصحاب .. قريبين ..والمعاناه ما كانتش في مفرداتنا
ودلوقتي كل شئ بيعاني جوانا..وحوالينا
حتى أحلى ذكريات ..أيامنا الي فاتت
لكن تعرف؟
أنا مش هاشوف الفيلم دا..
علشان أفضل راسمة جوايا الصورة الجميلة..لسلاحف النينجا وهما ايد واحدة
الصورة الي عشنا عليها سنين..اللامعاناه
الأولى..
لاحظ انهم اتفقوا على القائد برضا الجميع. صحيح هي طفولة كبرت شوية، لكن دا نضج. أيه رأيك عندنا في موضوع اختيار القيادات. انت فكرتني بحاجة، انا كنت بأقول بدل من المنظرة وانتخابات رئاسة الجمهورية يعملولنا انتخابات محافظين. اهي حاجة أقرب ونقدر نحس بيها أو انشالله انتخابات رؤساء المدن والاحياء. الخوف ان دي كمان هتتم بنفس فكر الحزب الوطني.
تفتكر هنختار في يوم قائد لينا برضا الجميع؟
اما بخصوص الكرتون والطفولة فاحنا جيل شاف ايام حلوة. شفنا حاجات ليها معنى. الله يعين اطفال اليومين دول. قال بيشوفوا سابق ولاحق وبي بليد. كرتون لتسويق منتج. وحاجات متخلفة وعجيبة.
فين ايام توم وجيري؟
dr roufy
معاكى حق فى كلامك
كل جيل بيبقا حاله أسوأ من الجيل اللى قبله
و اللى كان بيقوله عننا أخواتنا الكبار بقينا احنا بنقوله دلوقتى عن الجيل الجديد.
بس لو حتكون دى ذكرياتنا عن طفولتنا
يبقا الجيل الجديد ده ذكرياته ايه عن طفولته ؟؟؟؟؟
samir
بالنسبة للإنتخابات فدى سياسة عليا مفروضة علينا من أكبر منصب لحد أصغر فراش فى البلد
و كل مناظر الديمقراطية و الإنتخابات دى شكليات مش أكتر و أنت عارف الكلام ده أكيد.
و بالنسبة للكرتون فعلا احنا شفنا أيام حلوة مع توم و جيرى
بس يا ترى هما كمان لما يكبروا حيقولوا نفس الكلام عن سابق و لاحق و بى بليد؟؟؟
الجيل اللى بعدهم حيبقا بيشوف كرتون جمال و خديجة :)
ياه ... فكرتني بحاجة حلوة من بتاعت زمان
أنا كمان كنت بحب السلاحف جدا
بس زعلتني إن دلوقتي مفيش صخر وشنخر
دول كانوا من أقوي الشخصيات ف القصة
كله بيعاني
إشمعني يعني السلاحف يفضلوا تمام
بس الفرق ف النهاية
تحياتي
اجمل ما فى الانسان طفولتة
خلى طفولتك دايما جواك اوعى تسيبها
the alien
احنا جيل كامل إتربى على كرتون السلاحف و كابتن ماجد
بس واضح أنهم بيسرقوا مننا حتى ذكريات طفولتنا
و حتى المشاكل بقت فى الكارتون كمان
محدش مرتاح حتى السلاحف :)
تحياتى لك
ايوية:
و الله بحاول أحتفظ بيها بس حتى دى بتتسرق مننا
مش عارف إيه تانى حيتاخد مننا بعد كده.
ميرسى على التورتة صحيح
تسلم أيدك :)
يااه فكرتنى بأيام زمان
كانت ايام حلوه
بتمنى ترجع
ايام الطفوله و ال>هن الصافى
مفيش مشاكل
مفيش تعقيدات
فكرتنى باللى مضى
تحياتى
mariam
سعيد بأنى قدرت أنقل لك شعور الماضى الجميل
يا رب نلاقى حاجة فى حاضرنا تعوضنا عن ماضينا ده :)
تحياتى
نيااااااه
فكرتني بشنخر
كنت بحب أقلده بحركته السافلة
شانخار ....خخخخخخخ
محمد ثروت
لا تقلق
إن مات شنخر...فكلنا شنخر
خخخخخخخخخخخخخخخ
Post a Comment